前期準備功夫

 來源 – 一人七貓極限挑戰

如果你有大量寵物，首先你要知道嘅事：

第一，由於英國政府只係容許一個人帶五隻寵物入境，所以TOR1、Annex form你都只可以填五隻寵物。如果你多於五隻寵物，你係必須要有人同你同行。由step 1你已經要confirm到邊個會同你一齊走，然後將你嘅寵物由針卡到health cert，所有嘢都要寫嗰個人嘅名。我自己嘅情況係冇親戚朋友會喺近期一齊飛，所以我係喺各大嘅group入邊開post召集人同我一齊飛。帶定頭盔先，依件事係唔犯法，但係如果你對道德標準有強烈嘅追求，你可以自行衡量下。

第二，我book機票嘅時候係6月，當時已知飛到嘅航空公司，最多每人有三個quota可以帶寵物飛，但係只可以有一隻入客艙（In Cabin），其餘兩隻你可以選擇寄倉（In Hold）。所以如果你有多於三隻寵物，你係需要拎埋其他人嘅寵物quota，呢度同上一項講嘅唔同，由於你只係拎其他人嘅寵物機位，你嘅寵物依然係可以跟你名。

路線

我係由香港出發飛阿姆斯特丹，落機後轉Pet Taxi，直接由機場返屋企。如果遲啲飛法國有直航，最快嘅路線係飛法國，由Paris直接Pet taxi返屋企。無論你飛法國定荷蘭，途中會喺Euro Tunnel清關，毋需要聯絡清關公司，自行清關就可以。

訂機票

KLM同Air France係合作夥伴，我建議大家打去Air France訂機票，佢可以幫你即時check到你想飛既日子仲有冇寵物In cabin嘅位置，如果你真係好想直航飛法國，佢都可以直接話俾你知最快嘅直航係幾時。每架機會有6個位in cabin，in hold係冇一個實數嘅限制。揀好日子之後佢就開始幫你登記資料。首先係人嘅資料，都係俾返全名同email。寵物in cabin，你需要提供寵物姓名、品種同埋連袋之後幾多kg，限制係連袋要少於8kg，袋嘅size嚴格規定長闊高不大於46x28x24cm。寵物In hold，你可以選擇兩貓一籠，小型犬應該都可以，航空公司以每個寵收錢。你需要提供寵物姓名、品種、籠嘅尺寸同埋寵物連籠嘅重量。籠尺寸同埋重量如果唔肯定，建議報大少少，因為如果細過本身報嗰個數係冇問題，大咗就會有影響。可以俾大家參考吓，我兩隻貓用Petmate inter size籠。我當日查詢嘅價錢飛阿姆斯特丹，人嘅機票係HKD$6159，寵物in cabin USD$125，寵物in hold USD$200 per cage。當你提供晒資料之後，唔係即時confirm到，因為佢哋需要交上去審批，但係與此同時佢會同你講留位嘅Deadline。你需要係佢嘅deadline前打上去俾返你個ref. no 問批咗未，如果未得，佢會幫你extend個deadline。In cabin好快就會批到，in hold我都等咗好幾日先批。當所有寵物機位批晒，就可以俾錢，先俾咗人嘅機票錢，寵物機票到check in時去檯枱先俾。