Pet taxi、打晶片瘋狗症針

 來源 – 一人七貓極限挑戰

預約Pet Taxi

當你book好晒機票confirm咗日子之後，你要預約埋Pet Taxi。分享一下我嘅情況，我用嘅係 Jane’s Euro Pet Taxi。 同我同行有兩個人同一貓一狗，我哋總數係三個大人九隻寵物分別去英國三個唔同地方。Jane俾咗一個建議我哋，先用兩架van接晒我哋全部人加寵物加行李由AMS機場去euro tunnel，去到Pet reception清咗關，過埋tunnel，到咗英國境之後先separate 3架車去我哋嘅目的地。

大家最關心嘅價錢問題，報價£1495 per van，而佢只係收咗我哋兩架van嘅錢，已經係全包連埋euro tunnel fee。除返開3個人，每人大概£1000就可以由荷蘭機場直接返到各自屋企。

要留意嘅係，euro tunnel規定每架車入面只可以坐5隻寵物，如果你多於五隻就必須要分兩架車。你咁啱係6隻嘅話，最好都係睇吓會唔會夾到其他人，如果唔係就要自己俾晒兩架車錢啦。

好多人擔心行李方面會唔會放唔落，可以俾大家參考吓，我哋係四個inter size嘅大籠，每人兩件行李再加 hand carry篋，仲有兩隻貓入袋，都仲有位淨，下面放圖俾大家參考吓。

順帶一提如果想搵人夾Pet Taxi，我已經跟月份開咗TG group，有興趣入group嘅可以PM我。

打晶片、瘋狗症針

無論你嘅寵物係貓貓定狗狗，都必須要打ISO晶片同埋瘋狗症針。要計返入境時嘅英國時間，最少21日前做。晶片同瘋狗症針可以同一日完成，如果你有多於5隻寵物，依個時候你已經要決定5隻以外嘅寵物係跟邊個人嘅名，因為獸醫診所必須要有主人資料，同核對身分證，先會幫你開account，針卡先可以落到名。我係去大埔懷仁獸醫診所做，佢哋ISO晶片係需要一星期前訂定，建議大家早少少打去book。ISO晶片費用係$250，而瘋狗症針費用係$290。另外愛協都有得做，不過都係需要打去確認佢哋有冇存貨。瘋狗症針嘅有效期係一年，晶片就冇時限，可以早做嘅事建議大家都係盡早做咗佢先。

提一提大家打完晶片千祈唔好梳毛，因為粒晶片係米形size，所以個針窿都幾大，未埋口嘅時候都會有跌出嚟嘅風險。