香港-新加坡-荷蘭-英國 45個鐘之旅😼Part 2

  FACEBOOK PAGE1 PAGE2

想補足一下我part 1講得唔夠詳細嘅地方:

- Transshipment license 就淨係新加坡先需要嘅，暫時我未見過其他谷友有話其他國家都要申請

- License application到就揀返 ‘License to import/export/transship animals, birds, eggs and biologics’

- 可以提早申請個license 嘅，佢個有效期係由出咗approval果日計起30日 (e.g. 我係2月23號申請，2月25號收到個license，咁個license expiry date係25 March)

- 申請transshipment license 會需要upload ‘valid rabies vaccination record’ 要make sure 個針咭上面有主子嘅晶片號碼！我自己就upload埋佢打晶片張certificate (ONLY for import of dogs & cats)

- 另外申請呢個license 有個tricky 位，就係你要有一個Singapore local number for emergency contact呢個時候你就可能要搵朋友幫吓手，但佢哋唔會去聯絡呢個contact嘅，只係以防萬一。如果你真係搵唔到local number，你就要搵佢哋AVS recognised pet agent去幫你搞 (https://www.nparks.gov.sg/.../bringin.../general-information) 又或者(呢個係我老公講架姐)買一個local number 頂住檔先

咁番返去大王移民之旅 ～ 新航叫我哋check in早三個鐘到去，我哋班機就18:50 所以我哋3點半就已經到咗點知去到個counter都未開！等咗大約半個幾鐘到，就見到啲地勤人員開始行出嚟。果日都好多人搭新航，但又無見到有其他人有帶寵物，咁我哋就問吓個姐姐應該點做、排邊條隊，佢哋啲人都好nice咁叫我哋排premium economy果條隊。去到counter 到 感覺上佢哋都好清楚知道個手續，佢哋會睇哂所有documents同會影相嘅 (make sure你print哂啲documents 出嚟 有多好過少)

寵物位個價錢就係睇佢連埋個籠幾重嘅，大王就4.2k.g 連埋個籠就好似差不多8kg，個費用就大約$2600 搞掂哂之後佢哋叫我哋17:45先帶大王過嚟上機啦陪多佢一陣先咁我哋就同大行周圍行吓、餵佢食佢最心貓愛嘅treat treat同安慰吓佢啦，因為都睇得出大王有啲攰同唔耐煩

說再見嘅時刻終於到 ～ 原來飛去新加坡果程機有隻狗狗做鄰居，但大王就唔係好鍾意佢，hiss咗佢幾次(真係唔好意思呀如果果位主人都喺呢個Group)，我哋就跟住個工作人員推大王’入閘’。我實在好唔捨得佢，所以我都企咗喺個玻璃門出面望多陣先走 但我見啲工作人員都好小心又會同大王say hi我個心都舒服啲，最後就我哋自己上機了～

準備Boarding 時，我有問個地勤人員可唔可以check吓大王係咪已經喺架機到，個姐姐就即刻用對講機去幫我check。等咗5分鐘到，佢就confirm我大王已經上咗機啦去到新加坡轉機時，我都係一樣boarding時問個地勤哥哥大王係咪都成功轉咗機，我哋等咗15分鐘都無消息好緊張同埋驚係咪發生咗啲咩事！個哥哥就叫我哋上機先，佢應承我哋一定會嚟update我哋，我果刻真係好緊張個心跳得勁快 如果大王有啲咩事我會內疚一世!!!!大約過多15～20分鐘佢就confirm 我哋大王安全上咗機😮‍💨

13個鐘後就到咗荷蘭 我哋一到就即刻mark實 ‘odd-size baggage’個出口，但等咗一陣都未見到大王，淨係得啲BB車呀滑板呀。再等多陣有個機場人員行過嚟我哋到問我哋係咪有隻貓 (唔同我哋個樣真係咁貓奴?) 佢話你哋隻貓安全到咗啦 但佢喺另外果邊個odd-size baggage area，我即刻跑過去啦 但又見唔到佢，跟住有個哥哥過嚟問我係咪大王嘅主人呀？原來因為果班機得大王一隻動物，所以佢哋就直接帶咗佢去office 到等我哋去接佢，唔洗自己喺出面個輸送帶到等真係好好人!! 大王當時有啲神情呆滯，但我睇得出我一叫佢時佢知係我！佢即刻起身行過嚟我到 我老公拎埋啲行李過嚟，就打開個籠俾大王行出嚟抖吓。佢一行嚟就大喵幾聲，鬧爆我哋喺到搞乜野我哋發現佢張被仔濕哂同有陣尿味，連佢個身都有陣味，咁就快啲幫佢抹下個身清潔一下先。跟住就去清關，個美男海關人員()會要睇EU form對哂資料就拎去扱印啦，佢就無要求過要拎大王出嚟，只係就咁隔住個籠望一望姐。

我喺上一個post有講過本身係飛finnair嘅同埋會需要喺荷蘭過一晚先再搭船，所以我哋係已經book左一晚酒店。當我哋轉搭新航時發現，我哋會朝早七點就到荷蘭，距離上船時間成9個鐘！所以就決定keep 住間酒店房，咁我哋就可以去沖個涼抖吓同埋大王都可以去吓廁所休息吓。我哋有同間酒店講我哋會朝早先check in，佢哋都好好咁offer 我哋late check out等我哋可以休息吓再去上船。大王到咗酒店房之後，飲咗好多水但就無食野，淨係周圍行吓八卦吓咁啦～

我哋係搭DFDS去Newcastle嘅，咁就要喺船到過一晚夜 (2人1大王就一共£200)。去到碼頭個check in counter時，工作人員有要求睇GB form同埋會俾個microchip scanner我哋去scan大王嘅。船上面有餐廳呀bar呀果啲，我哋就決定order埋dinner buffet + breakfast ，價錢我就唔太記得，你預百零二百蚊一個人啦～ 而間房就細細哋，有獨立洗手間嘅。make sure 你有帶牙刷牙膏呀沐浴露果啲啦，因為船方面只有提供毛巾，同埋船上面買就貴啲咯。最最最開心係大王肯食野同去廁所！我哋有帶一個可以摺嘅貓砂盤，方便佢任何時候/地方都可以用同埋帶埋佢喺香港訓教張被！好緊要！

唔知係咪太肚餓同攰我覺得船上面食果兩餐都幾好食(佢dinner buffet有個燒羊腿，值得一試) 我哋都有去佢個bar飲杯啤酒嘆吓～有live music添 幾有feel 我哋果晚個海無乜大浪幾舒服，不過大王夜晚時一開始唔肯訓，不停叫，慢慢佢叫到攰就爬上佢張被到訓，我哋都終於可以舒舒服服咁訓吓

一晚過後，我哋就成功到達英國Newcastle天氣好好，好開心同grateful成個journey都無咩麻煩嘅地方 見到大王好開心咁喺間屋跑上跑落，所有hard work都係值得! 準備出發嘅主子奴才們，加油！