網友分享: 香港-土耳其-法國-英國

FACEBOOK PAGE 

香港-土耳其-法國-英國

全靠大家無私分享資訊 過程驚險擔驚受怕左好鬼耐 算得上千辛萬苦但都終於都帶到我兩隻貓入英國

土航機票費用 每張差唔多$6000

貓(in cabin)費用 兩隻total $2150

第一關 訂機票

本身好早就訂咗20/05 Swiss airline貓貓in hold機票 結果同好多人一樣 4月7號收到取消嘅消息 打左好耐電話問客服話最快都要9月中

嗰陣已經好緊張 期又趕 機位又緊絀 好彩睇到大家推薦土航 即刻打土耳其個熱線 等左漫長嘅時間 終於有個客服哥哥聽電話 佢同我一樣都係講唔鹹唔淡嘅英文 大家都唔係好明 雖然講左好耐但總算bk到2張貓位(in cabin)

但係跟據前人經驗 一直都好驚會比佢無意中取消左 所以訂完都唔敢鬆懈

呢段時間入面 我打左好多個國際電話問唔同分部嘅土航幫我check我2個貓位係咪健在

再上埋灣仔印埋confirm letter 睇到我貓貓嘅資訊 個心先淡定小小

但始終怕有個萬一 同時都bk多左另一間航空公司3日後嘅機票 (in hold)

土航in cabin size袋都唔易買 好彩係金魚街搵到

而飛機籠都買定拎埋去機場 自己怕有個萬一

第二關 漁農處

打針同晶片出發前幾個月已經約獸醫搞掂左

睇清楚有無過期 針藥label 張針每一個格仔有無漏填填錯

之後就到最緊要嘅填form診所出嗰張嘢寫到明要fit to fly

加簽 Health cert (EU + UK)自己反反覆覆填左幾次 到自我感覺良好先拎去比獸醫睇

用鉛筆框好晒要簽嘅名 金睛火眼望住每一個簽名連吸印 (記得用藍筆) 交完form係西九龍不停行嚟行去 等到佢收工都無電話先敢返歸一直驚到第二日 但總算有驚無險成功係大佬手上拎翻文件

第三關 機場 嚇到命到無嘅一環

夜晚機但因為心存不安 早左6個鐘到機場等

好早到櫃枱排第一check in 本身第一個主子都順順利利出機票 但到第二隻嘅時候 職員同我講:唔好意思 系統歞示無你隻貓個位喎 並且話班機已經貓位full左

嗰一下心入面嘅感受真係難以形容

完全慌張唔知點算好 有諗過但真係想像唔到會發生 好彩有少少理性拎翻張係灣仔print嘅嗰封信 同話比staff聽每隔2日我都打去貴公司唔同地方check貓貓個位 點可能發生咁嘅事 最尾爭論左好耐 叫我企埋一邊等 睇住職員跑嚟跑去打唔同電話 搵唔同rank嘅staff同我對話 搞左都唔知幾耐 又唔知要等候補定點 終於有人講話其實呢Business好似有個貓位 已經同佢講無論加幾錢都可以 只要有位就得啦 不過到最後關頭有位被稱為負責人出嚟又講話今次可以比返個貓位我

真係好好彩有拎到信同有其他通話證據

唔係我諗都未必拎得到個位

之後成功帶住貓貓磅重比錢

第四關 上飛機

香港飛土耳其過程順利

但到土耳其轉機又要緊張一餐

過境等好長時間 職員好嚴格 問一大堆問題 搜身 倒晒手提行李 仔細檢查主子 個幾鐘轉機真係好勉強 機場又大又長 由落機到登機口都係一直跑 終於再次成功上返飛機

飛多幾個鐘抵達法國

行到去職員又檢查文件 問一堆問題 睇下摸下隻貓 最後放行但表示唔會吸印仔

最後 pet taxi

Pet taxi 費用 $16000

成功搵到司機 揸左一陣去休息站又比主子去個廁所就入euro tunnel 嗰半個鐘都幾侷 主子好熱 好彩有帶風扇仔跟身 法入英呢關反而好順利 無點睇文件 終於捱多幾粒鐘去到屋企

關關難過關關過 大家無論移去邊個地方 成功帶埋主子一齊去就係好地方